من البحر إلى المستشفى.. ابنة سامي العدل تروي اللحظات الأخيرة في حياة شقيقها أحمد
كشفت الفنانة رشا سامي العدل، ابنة الفنان سامي العدل، تفاصيل اللحظات الأخيرة في حياة شقيقها أحمد العدل، والذي وافته المنية في الساعات الأولى من صباح أمس السبت.
وقالت رشا في سرد الحظات الأخيرة في حياة شقيقها أحمد: كنا قاعدين علي البحر في دهب في ساعة غروب بنضحك وبنعيط سوا ونشتكي لبعض قد ايه أبونا وحشنا وقد ايه الحياة من غيره صعبة فضفضنا لبعض ووعدنا بعض بحاجات كتير.
وأضافت:” رجع القاهرة على وعد بلقاء قريب نتجمع فيه تاني.. وجيه اللقاء بعد مكالمة تليفون الحقي أخوكي تعبان في المستشفي جريت عليه لقيت التعب والألم زايدين علي عمره عمرين مش عارف يتنفس وكلامه بصعوبه قعدت أكلمه واضحكه وأحاول اهون عليه شوية واسيبه يرتاح شوية، وفي عز محاولاتي نقله لمستشفي تانية فقد نبض قلبه لثواني قدامي اتخضيت الدكاترة طمنوني وقالوا مفيش حاجة اهو زي الفل.
وتابعت: بس قلبي وجعني ولقيتني بقول له عايزاك تسبح وتقول الشهادة معايا و تفضل تقول كل القرآن اللي أنت حافظه يا دوبك لفيت ظهرى ولسة هاخرج أشوف موضوع الإسعاف ونقله لقيت دكاترة وممرضين في كل حتة حوالين أحمد بيحاولوا ينعشوه ٣٨ دقيقة على الساعة محاولات وأنا واقفة قدامه قلبي بيتقطع وروحي انا بتطلع مني ماسكة في خيط امل من الدخان اتقطع بآخر نفس منه.
واختتمت ابنة الفنان الراحل سامي العدل: راح أحمد، أخويا الصغير الطيب الحنين الهادي.
